Nijbert en Nuus leggen op n hiel mooi plakje ien t Westen van onze mooie pervinzie Grunnen. De streek woar beide dörpkes gelegen bennen hef ook nog n eigen noam: t Westerkwartier, zo hiet onze regio ien t Nederlands – de minsken die hier geboren en getogen binnen nuumen t miestal gewoon körtweg ons Westerketier.
t Is n prachtege streek, dat Westerketier, met zien mooie landschap, woar elk die hier woont en leeft van genieten kin. En doar komt nog bij dat t hiel nuvere dörpkes bennen met n hiel drok socioal leven. Kiek moar es noar de Vrijbörg, of noar de Wieken: jem stoan der versteld van hoe drok dizze gelegenheden bruukt worren. Eigleks ook gien wonder as jem bekieken hoeveul verenegings der ien e beide dörpen bennen. Je heuren dat wel voaker, des te kleiner e woongemeenschappen, des te levendeger t verenegingsleven.
Wat mij ook opvalt is t drokke weekendleven van e jeugd die hum overal en naargens vermoakt, (veur heur is t leven ook ja één groot feest) en wat ze doarbij as stille getugen achterloaten. Wel op zöndagmörgen deur Nuus-Nijbert lopt of fietst, kin dizze stille getugen ook ja niet ontgoan. Fietspad, berms en sloten leggen mooi evenwichteg bezaaid met e restanten van Heineken, Coca en Sonnema.
Benoam de blikjes woar cola en beerenburg deur n kander mengd bennen worren te pas en te onpas uut e auto mieterd, of van e fiets onnerweegs votsmeten, net geliek woar de consument hum op dat mement beviendt.
Zwarfvuul is ja van alle tieden, en dat zal bin ik bang ook wel nooit aanders worren ook.
En gelukkeg bennen der ook aal meer minsken die heur bekommeren om dat zwarfvuul. Ik ruum zölf wel es wat op, en kom onnerweegs ook geregeld minsken tegen uut Moarum of Tolbert, die op heurzölf of met n groepke de berms en zukswat enigszins netjes moaken.
Dat geft de burger ja weer moed, dat der minsken bennen die heur ienzetten willen veur t leefboar holln van e leefomgeving. Want, vanuut de gemeente, pervinzie en e woaterstoat hef zuks ja gien “prioriteit” zoas de verantwoordeleke ambtenoaren dat numen as ik ze doar op aanspreek.
Gevolg is dat as de verantwoordeleke ienstanties heur niet bekommeren om de leefomgeving ien e gemeente, de jeugd dat al hielemoal niet döt. Veur heur moakt t ja niet uut hoeveul colablikjes of beerenburgflezzen der ien e sloot terecht kommen. En wat de poar vuilnisbakken die de gemeente nog hef betreft, viendt de gemeente t al stoer zat um die éénmoal of tweemoal ien e week te legen. Ook gien wonder ja, de bakken blieven wel leeg, t afval leit ja wel gewoon midden op de parkeerploats aan de Rieksweg.
Zukse problemen heuren ja bij een maatschappij die heur “slim, snel en modern” nuumt.
Wat mij dan persoonlek wel begroot is de locoatie van e begroafploats ien Nuus: doar leit vlak veur e heeg die t kerkhof netjes van e openboare weg ofscheidt t fietspad dat niet allenneg overdag intensief bruukt wordt as der een dikke viefhonderd kiender langs moeten op weg noar school op e Leek, moar ien e weekenden net zo goed. t Gebeurt regelmoateg dat, as der al dienst is ien e Nuusmer kerk, de koster eerst de beerenburgflezzen en bierblikken oprumen moet, die tussen de groaven ien mieterd bennen, vanof e fiets of uut t autoroamke. t Liekt wel bezunder, zo op zundagmorgen, n poar van die weekendrestanten die ien e felle zun leggen te glimmen tussen e graoven ien. Of zollen ze n soort van goden-offer brogt hemmen veur degenen die achter e heeg leggen?
Wel zal t zeggen!
Bert Weggemans