Westerkwartier

Kerstverhoal

• Bladwijzers: 91433


Bert Weggemans woont in Niebert en schrijft verhalen in het Westerkwartiers. Dit verhaal heeft hij speciaal voor Kerst geschreven. Bert publiceerde eerdere verhalen in de Dorpskrant van Nuis en Niebert.

ONVERWACHTSE HULP – KERSTZANG NIJBERT

De tied gijt zo snel, je hollen t hoast niet bij. Minsken bennen al weer drok bezeg met t binnenslepen van e boodschappen veur e feestdoagen, en t versieren van huus en tuun. Ik schrief dit verhoal twee doagen veur Kerst, en buten is t biezunder zaacht veur e tied van t joar. De vogeltjes bennen aan t kwetteren van wonder en geweld, dat t veur heur al veujoar is. Dat hemmen we ook wel es aanders metmoakt hier ien t Westerketier. Iedereen wiet noatuurlek nog wel die horror-winter van 1979, mor doar is al voak genog over schreven en verteld.

Diskeer wol ik het met jem hemmen over de winter van 2009. Zoas altied wer der ook dat joar ien t witte kerkje van Nijbert de traditionele Kerstzangdienst hollen. Tenminste, dat was wel de bedoeling van kerkeroad en vrijwillegers. Mor t weer zat niet biester met, een dag of drie veur dat t zowied was viel der een dikke loag snij. En dat was gien gewoon wit loagje, ditmoal was der sproake van een beste loag, t zal niet wied van de 50 centimeter af west wezen. Bij ons ien e J H de Boerstraat was t verkeer zo goed as tot stilstand kommen, en de Molenweg laag er ook niet al te florizzant bij.

Der werd al verteld dat een aantal kerken ien e omgeving de gebrukeleke zangdiensten aflast harren vanwege t winterweer. Ook ien Nijbert wer der al drok proat over t deurgoan of afgelasten van de zangdienst. Der laag wel slim veul snij, moar de stemming onner de organisatoren ien Nijbert was beslist niet negetief. Der mos wel bar veul snij ruumd worren, moar doar was vast wel n oplossing veur te bedenken. Eén van de mannen die methielp bij t meugelek moaken van de zangdienst sprak profetische woorden: ‘der komt n oplossing, hoe dan ook!’ Ik heurde zelf ook bij t koppeltje veurbereiders, en vroeg mij af hoe dat dan meugelek moakt worren mos. Niet allenneg het kerkepad was bedekt onner n dikke loag snij, dat gold net zo zeer veur de beschikboare parkeerploatsen. De plakken veur e kerk waren één loag ies en snij, en dat gold ook veur de sportzoal aan e J H de Boerstraat. Ik zaag mij der nog niet zo gauw kaans over. De dag veur kerst besloot ik es eefkes poolshoogte te nimmen – en, wel schetst mien verboazing: de parkeerploatsen bij de sporthal waren min of meer begoanboar moakt: der was wel een meter snij aan e kant schoven. En de krusing Molenweg/JH de Boerstraat was ook gangboar maokt. Eén van de mannen van Vogelzang uut Boerakker har s morgens vroeg al eefkes met zwoar materieel een pad moakt. Wat n onverwachtse hulp!De rest konnen we wel met schoppen en snijscheppen regelen. En toen dat aalmoal netjes moakt was deden we t zelfde op de krusing en de parkeerploatsen veur e kerk.

De dag dat t zover was, was der gelukkeg gien nije snij bijkommen. Wij konnen volstoan met t iesvrij hollen van e parkeerploatsen, dat deden we deur voldoende streuzolt over de parkeerplakken, de krusing en t kerkepad te gooien. Zo bleef t netjes en goed begoanboar. s Mirregs begon Berend al met t ploatsen van e omgekeerde weckflessen die gewoontegetrouw dienst deden als waxinelicht holders. Zo wer der een prachtig verlichte boan aanleit. t Leek wel de landingsboan op Schiphol, zo mooi, en Berend har eer van zien wark. De dienst zol begunnen om half aacht, en tien veur half zeeuven moek ik mij reisveerdeg om noar de kerk te goan, ik har mien reflecterende hes aandoan veur t oversteken van de bezoekers ien e gevoarleke bocht veur de kerk. en nam mien vaste ploats ien halverwege de bocht veur de Hervormde Kerk. We wissen dat er een boel volk kommen zol, want zangdiensten veur kerst bennen slim popelair bij de minsken die aanders nooit ien de kerk kommen. Ien dat dikke uur bij t oversteken van de bezoekers aan de dienst kwam ik van allerhande minsken tegen. Sommegen vertelden mij bij t oversteken dat ze uut NijRoon kwamen, en dat ze de auto stoan loaten harren bij de carpool rieksweg Niebert. Verders was t niet te doen west. Mor ze warren der beslist wies met dat er toch een kerstdienst was woar ze hinne konnen. Noa afloop warren we allemoal tevreden, der warren 120 liturgieën drukt, en die warren allemoal opgoan, de warren nog genog minksen west die met heur drieën met een liturgie doan harren. Noa afloop warren de minsken die ik oversteken liet dan ook dik tevreden, ze harren n mooie zangdienst had, met inbegrip van warme sukkeloademelk en kerstkransen. En toen ik dat onner t oversteken heurde was ook mien zangdienst goed: alle veurbereidings waren niet veur niks west, de bezoekers vonden t allemoal dik ien order!

91 aanbevolen
0 notes
433 views
bookmark icon

Geef commentaar

Het e-mailadres wordt niet gepubliceerd.