Westerkwartier

Huul eem was ik Jos Verstappen

• Bladwijzers: 8 • Comments: 182


Der binnen van dit mementen, ok ien een huwelek van meer as vitteg joar, die je niet licht vergeten.

En wat dat nou te moaken hemmen kin met Jos Verstappen is veur jim nou nog n groot roadsel, woar joe et antwoord gauw genog op kriegen zellen ien dit verhoaltje.

Ik heur jim al denken, hoezo Jos Verstappen? Zien zeun is nou ja veul bekender as dat Jos ooit west is. Komt zo: enne van e joaren negenteg keken wij met et hiele gezin op zundagoavend noar Studio Sport. De jongens en ik noar t voetballen vanzulf, de beide wichter keken meestal half ienteresseerd met, keken hooguut op as der een doelpunt viel, of as et publiek hier slim te keer gung.

Et bezundere van toen was dat et sportprogramma van e NOS aanderhaalf uur duurde: de eerste viefteg menuten met soamenvattings van de Eredivisie, doarna aandere sport: swemmen, hockey, atletiek en ook motorsport. Zo rond enne juni keken de wichter zeker met want dan kwammen de beelden uut Azzen, woar ien et leste weekend van die moand de TT weer verreden wer.

En zo hiel oaf en toe kwammen der ok wel es beelden veurbij van de F1, of te wel de Formule 1.

Wat mien vrouw doar nog van wiet is dat de enege Nederlander ien de hoogste klasse van de autosport op dat mement de Limburger Jos Verstappen was. En wat zij veural nog wiet te herinneren is dat zij dan zee, en nog aal zeit: was dat niet die coureur die altijd in de grindbak belandde?

Nou is dat messchien wel n beetje overdreven, mor die beelden stoan mij ok nog goed bij.

Hoogtepunt (messchien kinnen je et ok wel dieptepunt numen) was die keer dat Jos deur zien crew noar binnen roepen wer, toe de paddock ien. Zien raceauto moest bijtankt worden. Jos geheurzoamde de stalorders en kwam binnen. De mecaniciens stonden kloar om de tank weer vol te gooioen, en de banden te vervangen. Dat zuks ien tien seconden kon, doar harren wij gien begrip van. Toen Jos ien zien spiegeltje zag dat de banden al weer vastmoakt wadden, scheurde hij al weer vot, de boan op. Hij wis niet wat hum overkwam toen de eerste de beste boancommissaris hum de rode vlag toonde – dat betekende: dreks van de boan oaf!

Toen Jos zien bolide tot stilstand kwam zag er zulf ok wel wat der aan de hand was: et hiele stuk van de paddock tot de plak woar der van de boan oafstuurd was ha-der de complete tankslang achter de auto aan hangen had. Hij wis niet wat hum overkwam, et publiek vond et geweldeg, zij bescheurden heur van t lachen.

Aan e ene kaant wadden je der toch wel wat groots op dat der een Nederlander met dee, mor van de aander kaant ok wel jammer dat er zo voak noast et circuit belandde. Je wadden as Nederlander al trots a-der gewoon finishte.

Aan e ene kaant wadden je der toch wel wat groots op dat der een Nederlander met dee, mor van de aander kaant ok wel jammer dat er zo voak noast et circuit belandde.

Mor toen wisten wij nog hielmoal niet dat der een zeun kommen zol die Max nuumd wer, en die zo veul joaren verder ien e tied Wereldkampioen F1 worden zol.

Ien éen van die joaren negenteg gebeurde et dat op de nacht van zoaterdag op zundag mien vrouw niet sloapen kon van de pien. Dat kwam zo: de huusarts har zeid dat ze n groot tekort aan iezer har ien heur bloed: doarom gaf hij heur extroa starke iezertabletten met. Doar most ze heur goed aan holden, en beslist gien dosering oversloan.

Wat de dokter der vergeten har bij te vertellen was dat zukse medecienen flinke bijwarkings hemmen kinnen. Dat was mild uutdrukt. Et kwam der op del dat vrouwlief de hiele nacht op e kop ien t berre stond vanwege de pien. Sums kon ze et reren niet onnerdrukken deur die verscheurend felle pien.

Zij kreeg eileks gien sloap die hiele nacht, en ik ok niet, want as joen noaste zo’n pien het doe je zulf ok gien oog dicht.

Afijn, eindelek was et dan zundagmörgen. Et wer licht, de vogels begonnen te fluiten, en t was nog wel vroeg, mor wel al n fatsoenleke tied om op te stoan. t Eerste wat ik dee was om acht uur de huusarts bellen. Die har toen nog gewoon dienst vanuut zien eigen woning ien Tolbert.

Toen ik zee dat mien vrouw verging van de pien, en dat ze sunds woensdag extroa starke iezertabletten kreeg, begreep er de klachten. Hij zee: ik leg het recept voor het tegengaan van de bijwerkingen van de ijzertabletten over een half uur klaar. U kunt dan direct door naar de apotheek, die is van 9 -11 op zondagmorgen open.

Akkoord, dat was dudelek. Mor nou was et nog mor net tien over acht, dan was ik nog veuls te vroeg ja. Dus ik goa of twinteg over acht vast noar de auto, dan kon ik ja nooit te loat kommen. Ik stap toe de auto ien en zie dat de benzinemeter zowat op et leegste peil stijt. Dan mor eerst eefkes noar Nuus, noar t pompstation van Wiebe Oldenburger. t Was vroeg, ik har de ogen nog mor amper lös vanwege de sloapeloze nacht. Ik moak de LPG-slang vast aan de vulnippel en tank de gastank vol, loop noar et winkeltje woar ik oafrekenen kin. Nelleke ontvangt mij vriendelek, en zeit: wat binnen joe vroeg diskeer, en wat zien joe der nog sloapereg uut. Ik vertel heur et verhoal van de oaflopen nacht zunder sloap en betoal heur et verschuldigde bedrag veur de brandstof die ik net tankt heb, dan zeggen we nkander goeidag en fijne zundag. Ik stap gauw ien, want et is nou al vief over half negen, tied om achter de medicatie aan te goan. Ik start de auto, kiek en rie veurzichteg de Nieweweg op. Dan geef ik gas, want k wil nou ok wel snel te plak wezen.

Ik kiek veur de zekerheid nog ien mien binnenspiegel en wiet niet wat ik zie: midden op de Nieuweeg zie ik Nelleke stoan te swaaien, en zo stijt ze ok noar mij et roepen. Ik heb ien e goaten dat der wat loos is en zet de auto stil, draai et roampke lös. Nelleke stijt buten oadem veur mien geopende autoroampke. Ik kiek heur vroagend aan: i-der wat loos, Nelleke?, vroag ik. Joe hemmen de LPG-slang nog achter auto hangen. Ik kiek ien mien butenspiegel en zie dat ze geliek het. Beschoamd keer ik om terug noar de pomp, woar Nelleke de slang netjes oafkoppelt.

Niet te geleuven, mor ik harien Nuus veur nkander kregen woar Jos Verstappen loater beroemd met worden is.

Bert Weggemans

8 aanbevolen
1 notes
82 views
bookmark icon

Geef commentaar

Het e-mailadres wordt niet gepubliceerd. Vereiste velden zijn gemarkeerd met *