t Iegelswientje op zundagmörgen

ditisWesterkwartier

Zundagmörgen is altied mien vaste wandelmoment met e hond.  Zowel de boas as zien Duutse herder genieten dan volop, want zundagsmörgens is t altied zo heerlijk rusteg, want dan is der hoast gien verkeer bij de weg. Dan zien e boas en de hond hoe onwaarachteg mooi Nijbert en heur omstreken bennen. Dan pries is mij gelukkeg dat k ien t Westerketier woon.

t Is ook altied vaste prik om te zien wat e weekendvierders dizze keer achterloaten hemmen ien e barmen van oons dörp. Zoals altied leggen der weer genog Heinekenblikjes laangs de Molenweg, en zoals altied ook weer genog Cola-Beerenburg blikjes, en nog wat lege flezzen woarien een etmoal eerder nog volop alcoholische draank aanwezeg was.

Bij t bebouwde-kom bord NIEBERT gemeente Marum met doar onder het logo van de gemeente, en doar weer onder het webadres van onze gemeente: www.gemeentemarum.nl. kin ik al weer dudelek zien dat de feestbeestjes weer bezeg west hemmen. Eerst al n groene postbus die van e poal (met ketting!) afhoald is, en dan t bord Scouting Westerkwartier dat t hiele weekend veur een activiteit van de padvinderij bij t informatiebord stoan har, die is nou ien twee stukken broken en leit onder het bord ploatsbord Niebert. Ik blief eefkes stoan om met mijzulf te overleggen, wat k het beste doen kin: stoan loaten of oprumen. Ik besluut tot t leste, want t bord is ja toch al kapot. En net as ik mij buk om het bredje op te pakken wordt mien oog trokken deur een donkere schaduw die over één van de onderborden van de gemeente Marum hin leit, of misschien kin ik beter zeggen: der over hin hangt. Tot mien verbiestering zie ik het stoffelek overschot van een iegelswientje, die met e neus noar beneden over t bord hangt, t snoetje dudelek herkenboar noar beneden.

Eerst bin ik verdrieteg, want wel hoalt zuks nou ien e kop? Dat t dier dood is is veur mij ja al slim genog, t hef nou ook gien zin meer om de Dierenambulance te woarschouwen. Hier valt ja niks meer te redden. Wat mij ook treft is de wieze woarop de onverloaten het dode diertje achterloaten hemmen. Met zien kop en het snoetje noar beneden. Het liekt hoast asof t iegelswientje zölf ook verdrieteg is, hij hangt met e kop omdeel onder het bord Niebert – gemeente Marum.

t Is net of t zeggen wil: jongens, ien körten tied is t aflopen met de gemeente Marum, want as e plannen deurgoan, en doar liekt het nou toch wel degelek op, holdt de gemeente Moarum op met bestoan, en gijt ze over annerhaalf joar op ien e nije gemeente Westerkwartier.

Misschien hemmen de onruststokers t dier ook wel expres achterloaten op dit bezundere plakje – t was misschien wel heur menier om tegen het ontstoan van de nije gemeente te protesteren.

Wel zal t zeggen?

Ien aal geval heb ik der veur zörgd dat t beestje netjes en fatsoendelek (zoals Nicolaas Beest al schreef) begroaven is ien e Nijberter grond, en zoals dat heurt, ien een eigen klein kuultje.

Meer artikelen

1 REACTIE

  1. Mooi verhoal Bert.
    Jammer dat alles achter de kont hin gooit wordt.
    En al dat vernielen wat het veur zin.
    En over het egelzwientje mor te zwiegen.

LAAT EEN REACTIE ACHTER

Vul alstublieft uw commentaar in!
Vul hier uw naam in

Laatste artikelen