Westerkwartier

Groates Kerstboom!

• Bladwijzers: 31201


Onze jongste zeun het et van kiends oaf aan ien hum om overal woar er dat kan veurdeel uut te hoalen. Dat had er al toen er een joar of zeuven was. Het liep tegen Moederdag en hij wol groag wat veur mamme kopen, van zien eigen spoargeld. Ik was doar wat beholdend ien en zee dat ik et een hiel mooi idee van hum vond, mor dat niet te bodde veul veur zien spoarpot kosten mog. Hij luusterde volgens mij mor met een haalf oor, en s mirregs toen mamme en ik op e Leek boodschappen deden bij de supermarkt vroeg hij ons of hij eefkes noar de Blokker mog om iets veur Moederdag te kopen. En mamme zee t zulfde: wat lief, mor niet te duur heur!

Wel schetst onze verboazeng toen er op de ochtend van Moederdag met n mooi pakje aan zetten kwam op t mement dat mamme toe de woonkoamer ien kwam. “Voor jou mam, voor Moederdag” zee er, en mamme was geroerd vanzulf. Ze pakte et kadootje uut en was verboasd over wat ze zag: een hiel mooie kop en schotel,  mèt een schier lepeltje. Gien zulver vanzulf, mor wel n degelek roestvrij stoalen theelepel. “Maar jongen dat is ja veel te duur!” riep mamme uut, toen ze alles netjes op toavel zet har. “Dat viel reuze mee hoor mam”, zee de kleine man. Hoeveul er betoald har wol er niet zeggen, mor de woensdag doar op kwam er met zien verrazzing boven toavel. Ik was bij de kiender, t was mien oppasdag, en mamme ston op dat mement veur de klas ien de Stad Grunnen. En omdat mamme der zulf niet bij was vertelde t verhoal aan mij: hij zee: “Pap, weet je hoeveel ik voor mam haar kadootje betaald heb bij Blokker?” Ik zee: “ Nou, t was zo n allemachteg mooi kopje, ik denk minstens wel zeuven en halve gulden, mor misschien ook wel n tientje”.

“Haha, zee er, lekker mis. Ik heb gezocht in de opruimingshoek, en daar vond ik deze kop en schotel voor mamma. t Kopje was maar één gulden vijftig, en het lepeltje kostte maar vijfenzeventig cent”

Ik zee: Nou, doe magst voaker ienkopen doen, want zukse koopjes viend ik eileks nooit.  “Gewoon een keer met mij meegaan pap, zee er, dan vinden we vast wel wat moois voor een kleine prijs.“

Dat veurdeel hoalen zit bij hum ien zien bloed. Hij holdt bar veul van korting. Toen er al wat older was toen har er de folders van Kruidvat zo goed deurnommen op körting, en liefst nog körting op körting, dat er bij de kassa hoast geld toe kreeg op wat er kocht har. Achter hum vörmde zich al n beste rij, en de kassamedewerkster werd hoast moedeloos toen ze alle körtings berekenen moest. Ze hoald de filioal chef der mor bij. En die kon niks aanders bedenken dan dat er dizze jongeman geliek geven moest. En zo ging er mèt kassabon en vief körtingsartikeln zowat groates de winkel uut. Tot opluchting van de klanten achter hum, die bliede waren dat ze eindeliek aan e beurt kwammen.

We lopen op dit mement al weer oardeg op de Kerstdoagen aan, en t is nog niet dudelek in hoeverre wij die bezundere doagen vieren kunnen, in verband met de corona-moatregeln. Mor wat al wel dudelek is: wij hemmen al vast een kerstboom, en een hiel mooie ook. En wat óók dudelek is: dizze prachtboom is honderd procent groates. Vroag niet hoe t kan, mor t is zo. Zo op n onverwacht mement kreeg mamme een appje van onze zeun, ienderdoad, dezulfde as van dat koopje bij de Blokker op e Leek. Mor mam moest wel snel beslizzen: mam, ik sta nu bij de Gamma aan de Peizerweg, en daar hebben ze een speciale actie, alleen vandaag en morgen. As je voor meer dan honderd euro tuin- en kerstspullen koopt dan krijg je er gratis een hele mooie kerstboom bij. En ik heb net nieuwe spullen gekocht voor mijn eigen huis, dus als je wil kun je van mij de kerstboom gratis krijgen. Enige voorwaarde is dat je nu meteen moet komen. Mamme keek mij es aan: `Wat viendstoe, moet ik dat dan mor gewoon doen? Ik zee, goa mor, dan het hij der plezier van en wij ok.`

Beste knoap

Mamme pakt heur Chevrolet Kalos en riedt op e Peizerweg ien Stad aan. As ze doar eefkes loater aankomt wiet ze niet wat ze zigt: een glunderende zeun en een beste knoap van een kerstboom. Nou was de vroag of t boomke (eileks: een forse kerstboom) wel ien e woagen paste. Ze hemmen alle stoelen ien e auto plat leid, de achterklep moest open blieven en met n touw steveg vast moakt worden, en toen kreeg ze de groates kerstboom net zo n beetje met noar  Nijbert. Onnerweegs prikden heur wat takken ien e nek, en toen het ze ok mor et  dakroampke open moakt, woar vot doalek de tak deur hinne stak die heur net nog ien e nek prikte. Veurzichteg is ze over de rechter rieboan van de Rieksweg op Nijbert aan reden, beslist niet te haard, want ze wol geen ogngeluikken hemmen vanzulf.

Zo kwam ze veileg en wel thuus, en ik was veraltereerd over de omvang van dizze kerstboom: zo n eksemploar harren wij nog  nooit had. We moesten der met zoag en biel bij om de stam van e boom pazzend te moaken veur de voet van de kerstboomstander.

Mor t is gelukt, en wij bennen alemoal bliede over de zoveulste gunstege aankoop van onze jongste zeun. En pabbe wiet nou al hiel zeker dat er van die kolossoale stam noa de kerstdoagen een prachteg beeldhouwwerk moaken kan met zien beitels en gutsen.

Dan hemmen we een blievende herinnereng aan dizze bezundere Groates Kerstboom!

Bert Weggemans

31 aanbevolen
0 notes
201 views
bookmark icon

Geef commentaar

Het e-mailadres wordt niet gepubliceerd.