Mien hobby’s binnen lezen en schrieven. Doar stoa ik met op en goa ik met op berre. Zoas n aander hum riek vuult a-der weer wat nijs toevoegen kin aan zien verzoameling, of dat nou antieke speulgoed auto’s binnen of voetbalvoantjes as t mannen betreft, en antieke poppen of dito wiegjes as et om n vrouweleke hobbyist gijt, zo bin ik altied weer bliede as ik n nije dichtbundel aanschaf, woar ik heerlek ien lezen kin, en woar ik weer nije ienspiroatsie opdoen kin veur mien eigen gedichten en verhoalen. Want, heb ik maarkt, schrievers ienspireren ok weer aandere schrievers, en dat moakt lezen en schrieven zo mooi.
Mor de binnen vanzulf ok genog minsen die genieten van heur verzoameling postzegels, of, zoas ien et verhoal woar et dit keer over gijt, van heur verzoameling munten. Niet elk en een viendt ien zien tuun een kostboare schat met zulveren munten, mor zollen dat wel hiel groag willen. En omdat n dreum nou eenmoal voak n dreum blift, begunnen ze wat op eenvoudiger niveau.
Job, die bij ons ien e stroat woonde toen wij hier ien Nijbert kwammen te wonen har hum op et moment dat zien waarkverplichtings ophielden ok een hobby aanmeten. Ien e joaren dat er bij de posterijen warkte, toen nog de PTT, veurganger van wat tegenswoordeg PostNL hiet, ha-der zo òf en toe wel wat bezundere munten aanschaft, a-der weer es n uutgifte kwam van beveurbeeld herinneringsmunten. Job was niet allineg met zien verzoameling ien e weer, volop aktief wa-der ok ien t verenegingsleven hier bij ons ien t dörp. Doar kwammen wij nkander regelmoateg tegen.
Eenmoal ien t joar kwam ik bij Job en zien vrouw op huusbezoek van de kerk hier ien t dörp, en dan spraken je over van alles en nog wat, over de verenegings, voetbal en scheuveln en goa zo mor deur.
En één moal ha-der zien liefde veur munten nuumd, mor dat stelde die eerste tied nog niet veul veur.
Mor ja, dat verzoameln was ien e begun joaren nog al wat hap snap goan, toen der nog volop aan t wark was. Toen er met AOW-pensioen kon, kwam der vanzulf zo veul meer tied beschikboar veur wat der echt slim oareg vond. Job schafte hum catalogussen aan veur bezundere munten, doar kon er mooi de weerde van e munten ien opzuken. En a-der hier bij ons ien t Noorden een enkele keer een muntenbeurs was, dan ging er doar noar toe. Van de priezen van de munten wa-der oardeg op e hoogte, want die werden regelmoateg ok wel ien kranten advertenties aanboden. Die priezen vielen hum nog niet met, mor hij wis ien aal geval hoe de markt veur bezundere zulveren munten ien n ander zat.
As ik dan de volgende keer bij Job en zien vrouw kwam, kwam de hobby niet meer ter sproake. Zien vrouw zee dat er et eileks gien woord hemmen wol, omdat aander lu et messchien wat kienderachteg vienen zollen, mor zien liefde veur zien kleine verzoameling was eerlek en oprecht. Hij moek der wark van, mor dat hiel der mooi veur humzulf, zien eigen vrouw wis ok niet sekuur hoeveul Job der ien e tied bij verzoameld har. Doar proaten wij niet over, zee ze, ik heb mien verzoameling antieke stoffen beurskes, en dat is mien affeer, en zo holdt Job zien hobby ok veur humzulf.
Op n bepoald moment kreeg ik vanuut de kerkenroad n seintje, dat ik weer es eefkes laangs Job en zien vrouw goan moest, der was wat gebeurd woar de bejoarde minsen oareg deur van t stuur òf kommen wadden. Et gebeurde wel voaker dat minsen die ien mien wiek woonden wat tegenslag harren, n been broken deur n lelijke val of zuks wat, en ik kreeg ook niet echt e heuren wat der nou aan de hand was bij dizze vriendelek minsen ien mien wiek van de hervormde kerk. Dus ik kochde gaauw een mooi bloemke veur heur beiden en kwam doar s ovends aan de deur om te heuren hoe et met heur beiden ging.
Bij binnenkomst zaag ik al wel dat der wat beurd was. Job en zien vrouw wadden niet zo as aanders. Wat vermoeid oogden ze beiden, wat aansloagen. Job zien vrouw gaf ik de bloemen van de kerk, doar was ze bliede met. Mor Job, zee ze, die het et der nog al stoer met. Ik wis nog aal niet wat of der nou eileks beurd was, mor toen ik bij Job ien e woonkoamer zitten ging, vertelde mij al gauw wat der aan mankeerde: Veurege week moandag zee Job, toen wij noar de toneelvereneging wadden veur de repetities, toen i-der bij ons ienbroken. Wat n schrik was dat, jong. De hiele keuken laag over hoop, alle keukenkastjes wadden leeg hoald, net as de gewone opbergkasten.
Vrouw en ik schrokken ons beroerd, en ieneenent sloeg mij de schrik om t hart. Mien verzoameling, kreunde Job, en wer zoas zien vrouw et zee, liekbleek om e kop. Job stommelde noar boven, zee ze, noar zien hobby koamer, en kwam total verwilderd weer noar beneden toe.
Zien vrouw ging met hum met om te zien wat der prezies loos was: en zij zag et ok votdoalek: et zachtboard plafond van de veurmoalege sloapkoamer, die nou dus dienst dee as hobby koamer, was totoal aan flarden scheurd. Mor…stoamelde Job zien vrouw, welke idoot scheurt nou et plafond van een doodsimpele sloapkoamer uut nander? En der binnen toch aargere dingen, Job, as n kapot plafond. Job zee eerst niks, en toen er n hiele schoft stil west was, zee der hoast stotterend tegen zien vrouw: Mien verzoameling, mien muntenverzoameling, die har ik doar verstopt.
Liekbleek
Toen wer zien vrouw ok liekbleek: doe meenst: aal dien verzoamelde munten binnen stolen? Ik kin mij der huulmoal niks bij veurstellen, want ik wist hielmoal niet dastoe doar dien schat verstopt hast. Spiet mij, zee Job, dat ik et nooit tegen dij zegd heb. Ik wol dij der niet met belasten. En nou is et onveurstelboare toch gebeurd.
Afijn, de beide bejoarde lieve minsen hemmen de politie beld. Die nammen de aangifte op en zeden dat ze de volgende mörgen as t daglicht was weer kommen zollen veur noader onderzoek. De uniformagenten hielden woord, aander mörgen wadden ze al om half negen weer present en deden heur vervolgonderzoek: Bij daglicht zie je veel meer dan in de avond laat, zeden ze. Al gauwachteg zeden de agenten: een bekend patroon, meneer en mevrouw: ze zijn overduidelijk via het wc-raampje naar binnen gekomen en hebben daarna de deuren van de woning van binnenuit opengemaakt.
We kunnen niet anders dan concluderen dat deze inbraak door verslaafde inbrekers is gepleegd. Want je moet wel heel mager zijn wil je door een smal wc-raampje naar binnen kunnen komen. Job zien vrouw vertelde dat ien e keuken ok alle snoeppotten leeg wadden. Dat klopt dus prima met ons vermoeden van inbraak door verslaafden, zeden ze. Het stressniveau is na zo n inbraak zo hoog dag ze meteen een enorme behoefte hebben aan zoetigheid. En dan zou het ons ook niet verbazen als ze ergens buiten het huis ontlasting sporen hebben achtergelaten, ook een patroon bij inbraak door junks. Ze gingen kieken, en ienderdoad, op et terras, veur et wiendscherm, vonnen ze een hoopje menseleke ontlasting. De schop moest der aan te pas kommen om et weg te schrapen. Hoort ook bij het daderprofiel, zee de oldste van de beide agenten verslaafden eten niet of heel ongezond.
Nodat ze van de grootste schrik bekommen wadden belde Job de aannemer uut Moarum op om de schoade te herstellen. En toen ik de keer doarnoa weer langs kwam om de Kerstmand van de kerk te brengen, zaag ik al votdoalek al dat der twee iezeren troalies aanbracht wadden veur et wc-roamke.
Foei foei, dat was n nog nooit eerder vertoonde harde werkelekheid ien Nijbert: een fiets was körtleden al n keer ontvreemd, mor n ienbroak uut e stad was wel eefkes aandere koek.
Bert Weggemans