Ien t Nederlands wordt der wel es zeid: Dat werkt als een een rooie lap op een stier. Nou heb ik mij vertellen loaten dat wij ien t Westerketier het woord ‘bol’ bruken veur t Nederlandse woord stier. Afijn, mien verhoal gijt over e kracht van dit bezunder staarke dier. As mien pabbe vroeger met e koe noar de bol ging dan was dat veur mij as kiend n ervoareng die k nooit weer vergeten zal.
Ik was n jonkje van n joar of 8 toen mien pabbe tegen mij zee: Kom jong, hier hestoe n tak en doar lopstoe straks met achter onze koe aan. Ik neem de koe aan n touw en goa met heur noar de bol. En as de koe dan niet meer lopen wil dan gefstoe heur n tikje met de boegzoame tak tegen heur kont, en dan lopt ze vanzulf weer wieder. En noa n wandeling van n kilometer of twee dan kwamen we bij de bol-holder, Harm Nijhof. Mor veur we bij Nijhof zien boerderij waren dan har dat grode beest, dat mien pabbe bolle nuumde, ons al ien e goaten. Alderminsken nog aan toe, wat n beest. Onnumelek groot, iendrukwekkend, reusachteg, met n dikke iezeren ring deur zien neus, dat bennen de woorden die mij te binnen schieten as ik aan t dier denk wat onze koe dekken zol, hopelek kreeg onze koe dan n mooi kalfje vanzulf. En ik har ok al gauw ien e goaten dat er hum om ons niet zo drok moek, mor om e koe die wij bij ons harren. Nijhof kwam toe zien boerderij uut en hoalde de stier uut et gruunlaand. Hij moek de ketting lös woar de bol aan vastmoakt zat. Harm leidde zien stier noar onze koe, en t spektoakel kon begunnen. De bol klom op onze koe, wat iendruk moek. En dan de dekking zulf, wat kwam doar n kracht bij kieken jonges. Nijhof gung achter de bol stoan en sloeg hum hard op zien kont, net zo lang tot de bol zien klus kloard har.
En dan de dekking zulf, wat kwam doar n kracht bij kieken jonges.
Jem vroagen je naotuurlek oaf wat nou t woord Max energy te moaken het met dizze bol, een rooie bol nog wel. As ik ien Nederland de noam Max vallen loat dat kin t mor over één persoon goan: onze Formule-1 coureur uut Limburg noatuurlek, Max Verstappen. t Coureur wezen zit bij Max ien t bloed vanzulf: zien pabbe Jos har ja ok al racet ien de hoogste klasse van de autosnelheidssport.
Onze garageholder uut de Jonkersvoart het n zeun, Bastian, die hoast van dezulfde leeftied is as Max, en hij het net as Max vanoaf zien kienderjoaren verslingerd west aan t Karten, dat wordt over t algemeen zien as de meest ideoale opstap noar het Formule 3, 2, en uuteindelek Formule 1 racen. Max en Bastian hemmen as kiender en ok loater as opgroeiende jeugd met n kander metdoan aan dezulfde kartraces. Bastian zien pabbe vertelt wel dat Max der nog jonger bij was as zien eigen zeun. Max was n joar of vier toen er al n eigen kart kreeg, op kienderformoat vanzulf.
Bastian het n priezenkast vol met grode bekers en kranzen en vlaggen en voanen, alemoal aandenkens aan Kart-wedstrieden ien Nederland, Duutsland, Oostenriek en Itoalie. Mor woar Bastian trouw bleef aan e Kart-sport, doar gung Max wieder en wieder, jem wieten alemoal wel woar dat ienmiddels toe leid het. Max kreeg n stoeltje ien een Renault van Toro Rosso, en nog weer loater, toen er hum al dubbel en dwars bewezen har, ien een nije Honda van de Red Bull stal.
BOL
En doar komt de bol toch om de hoek kieken. t Is gien gewone bol, mor n rooie bol, ofleid van de energy drank van de hoofdsponder Red Bull. Woar de bol symbool stijt veur oerkracht, doar stijt de rooie bol van Max zien renstal veur de supersnelle prestoaties van van zien Redbull race auto. En wat hoalt die jonge der een snelheden uut, wied over de 300 kilometer per uur. Max het ok al n poar Formule-1 races wonnen, zoas de grode Pries van Spanje, de Formule-1 race van Barcelona . Echt n prestoatie om trots op te wezen. Ik heb mij deur n par racefans vertellen loaten dat Max zien auto zó hard gijt omdat er gien benzine ien zien tank het, mor dat zien tank gewoon voltankt is met Red Bul energy, vandoar de onnure kracht.
Max is ien t hiele laand populair, en ok ien t butenlaand. Mor hier bij ons ien t Westerketier het er ok veul fans. Ien aal geval wel twinteg, want elke zundagmörgen as ik langs e Boerakkerweg loop met onze herder dan roap ien aal geval dat aantal Red Bull blikjes op. De rode bol kikt mij dan grel aan, veur ik hum veileg opbaarg ien e Milieuzak van Hoekzema. Gien wonder dat ze zo bij de weg slingeren, omdat der noa het leegdrinken van zo n blikje energy drank zoveul energie deur je hinne stroomt dat t bodweg onmeugelek is t metoalen blikje ok nog mor één seconde vast te hollen.
Je stoan, zoas één van de jongen zee die zien lege blikje weggooid har: as je Red Bull dronken hemmen, dan stoan je gewoonweg onder stroom.
Bert Weggemans