’t Is al weer een haalf joar leden dat jem mien verhoal 2 + 1 = 1 lezen konnen op ditiswesterkwartier. Der is veul reaksie op kommen uut ale hoeken van onze nije gemeente. Aldereerst vanzulf vanwege de bezundere titel, die votdoalek e aandacht trekt. Want hoe beroerd je ok waren met rekenen op e legere school, elkeneen wiet zo langzoamerhaand wel dat 2 + 1 geen 1 wezen kin.
Mor doar dacht de gemeente ja aanders over, dat is ja voak zo. Je kinnen je t verhoal nog wel ien grode lienen veur de geest hoalen: de gemeenteleke carpoolploats onner t viaduct bij Nijbert aan de Rieksweg was ien aal geval al van oaf 2007 niet allinneg parkeerploats, mor ien e aldereerste veur t zicht een dependance van de Tweemat ien Groodegast: je huufden der niet eens op te kommen, mor der laangs rieden was al genog om te zien dat over t hiele oppervlak een vuulstortploats was. Ien 2007 heb ik mij aanmeld as vrijwilleger van de Stichting Nederland Schoon, en ik heb der bij verteld dat ik ien aal geval de carpool bij Nijbert n beetje schier hollen wol, want de gemeente die der veur verantwoordelijk is, deed et ien aal geval niet. Twee kleine bakjes, met nkander nog niet ter grootte van een haalve grieze kliko, doar moes ale afvaal ien van de ongeveer duzend gebrukers die wekeleks heur auto hier parkeerden. En die kleine bakjes werren as je geluk harren één moal ien e week leegd, sums twee keer, en ok voak genog hielmoal niet. k Heb der voak genog over aan de bel trokken bij de gemeente (eerst Moarum, loater Westerkwartier), mor hoe voak ik ok belde of mailde, der veraanderde niks. t Haar wel de aandacht van de gemeente, doar bleef t bij. Dat ze der aandacht veur har bleek toen uut kwoajegheid van de betreffende ambtenoar de grootste van de beide bakjes verwijderd wer, zo wol de gemeente de gebrukers van de pakeerploats opvoeden: as ze niet luustern willen, dan moeten ze mor vulen.
De redactie van ditiswesterkwartier was verbiesterd over zoveul onbegrip en trok noa het verschienen van mien verhoal aan e bel bij de verantwoordeleke ambtenoaren van onze nije gemeente. Vroeg om opheldereng. En bleef bellen, elke week weer, hoe het nou stond met de onhygienische stoat van de openboare parkeerploats. Ientussen schreef ik een officiële brief over dit onnerwaarp aan de wetholder, met de mededeleng dat ik vanwege onwil van de gemeente stopt was as vrijwilleger van Nederland Schoon, en dat ien de zes week dat ik t niet meer bijhield de carpool weer veraanderd was ien de toestand zoas ik die veur 2007 mor aal te goed kind har. En ik vroeg heur om dizze onverkwikkeleke zoak fatsoenlek op te lossen.Een antwoord heb ik van de gemeente, niet ontvangen, niet schriftelek, niet telefonisch, niet per e-mail. Mor: der gebeurde aal wat: zes week loater wer ok t kleinste oafvalbakje verwijderd van de lanteernpoal woar der aan vast moakt was – en, wel schetst mien verboazeng: der kwam een eernse, moderne, en fatsoenlek grode oafvalienstalloatsie te stoan die verankerd was ien e bodem. En nog met elektrische bedieneng ok.
De redactie van ditiswesterkwartier het de gemeente dudelek moakt dat t leeg hoalen van de bak mor één deel is van et onnerhold van de carpool: de 52 parkeerplakken alsmede e bermen der om toe moeten ja ok netjes holden worden.
Ik bin zulf sinds eind oktober niet meer ter ploatse west, ik rie der wel es laangs met e auto, en ik kan niet aanders dan concluderen dat t geheel van de parkeerploats onner t viaduct der nou netjes bij leit.
Nou kinnen je zien wat de reikwijdte is van e schrievende pers: 2 + 1 is nog steeds 1, mor diskeer wel met n fatsoenleke oafvalbak. met één actie hemmen we der gezoamenlek veur zörgd dat we as Nijbert zijnde geen omkieken meer hemmen noar de parkeerploats ien ons dörp.
Bert Weggemans